Кивĕ Вăрмарта пурăнакан Нина Михайловнăпа Вячеслав Леонтьевич Морозовсем пĕрлешсе çемье çавăрнăранпа июлĕн 23-мĕшĕнче 52 çул çитет. Паянхи кун та килĕштерсе, пĕр-пĕрне ăшшăн куçран пăхса пурăнаççĕ вĕсем.
Эçпепере çуралса çитĕннĕ Нинăна шăпа Кивĕ Вăрмар каччипе Вячеслав Морозовпа пулма пиллет. Нинăн аппăшĕ шăпах Кивĕ Вăрмара качча тухнă пулнă, аппăшĕ патне хăнана кайсан сăнать те Нинăна кÿршĕри Вячеслав...
Нина Михайловна Морозова 1937 çулхи июлĕн 22-мĕшĕнче Эçпепе ялĕнче çуралса ÿснĕ. Ялти шкулта 7 класс вĕренсе пĕтернĕ хыççăн Нина Вăрмарти шкула çул тытать, анчах çав вăхăтра укçа тÿлемен ачасене вĕренме илмен. Нинăн çемйинче вĕренÿшĕн 150 тенкĕ паракан пулман. Вĕренме май килменрен аппăшĕ ăна Вăрмарти çăкăр пекарьнине ĕçе вырнаçтарать. Кунта ĕçлекенсен йывăр михĕсене те хăйсенех йăтмалла пулнă, чустана алăпа çăрма тивнĕ. Талăкĕпех ĕçлемелле пулнă. Пекарньăра 2 çул ĕçленĕ хыççăн Нина ун чухнехи суту-илÿпе коопераци шкулне (халĕ вăл техникум) повара вĕренме каять. «Хула хĕрĕсем экзаменсем умĕн юрласа-ташласа çÿретчĕç. Йăлтах пĕлеççĕ ĕнтĕ çаксем тесе ăмсанаттăмччĕ вĕсене. Эпĕ вара 2 çул каяллах шкул пĕтернĕскер экзаменсене тытаймастăпах ĕнтĕ тесе кулянаттăм çав вăхăтра», - аса илет халĕ Нина Михайловна. Пăшăрханни кăлăхах пулнă унăн. Математикăпа та, вырăс чĕлхипе те «5» паллăсем илет хăй. Хула хĕрĕсем вара вĕренме кĕнисен списокĕнче хăйсен хушамачĕсене тупайман. Çулталăк ытла вĕреннĕ хыççăн практикăна тăван районта, Вăрмарти шкулта аслă поварта тухать. Нина Михайловна пурнăç тăршшĕпех тĕрлĕ çĕрте аслă поварта тăрăшнă, пĕтĕмĕшле обществăлла апатлану предприятийĕн системинче 34 çул ĕçленĕ. Ĕçре тăрăшулăх кăтартнăскерĕн сăн ÿкерчĕкĕ яланах Хисеп хăми çинче пулнă. Ĕç вырăнĕнче пухнă йышлă Тав хучĕсене те Нина Михайловна чыслăн упрать.
Вячеслав Леонтьевичпа Нина Михайловна 1961 çулхи июль уйăхĕн 23-мĕшĕнче çемье çавăраççĕ.
Вячеслав Морозов 1935 çулхи октябрĕн 5-мĕшĕнче Кивĕ Вăрмар ялĕнче çуралнă. Ялти 7 класлă шкул хыççăн Вăрмарти шкулта 2 çул пĕлÿ пухнă. Шкултан вĕренсе тухсан Зеленодольск хулинче чукун çул çинче аслă рабочи пулса тăрăшать. 1954 çулта Вячеслав çара каять. Шăпах 1956 çулта Венгрире пăлхава путарнă çĕре хутшăннă. Служба хыççăн Вăрмарти сĕтел-пукан фабрикинче 2 çул ĕçленĕ.
Вячеслав Леонтьевича таврара ăста автоэлектрик тесе пĕлеççĕ. 1960 çултанпа мĕн пенсие тухичченех вăл Вăрмарти автотранспорт предприятийĕнче автоэлектрик ĕçне туса пынă. Ĕçленĕ вăхăтрах Вячеслав Леонтьевич Хусанта автоэлектрике вĕреннĕ. «Тутар республикинчен те машинăсем юсама килетчĕç ман патне», - аса илет В.Морозов. Ăста автоэлектрик обществăлла ĕçсене те активлă хутшăннă. Вырăнти профсоюз комитечĕн председателĕ, халăх сучĕн халăх заседателĕ, ĕç коллективĕн канашĕн председателĕ пулнă. Вячеслав Леонтьевичăн Хисеп, Тав хучĕсем 30 яхăн.
Морозовсем икĕ ывăлпа пĕр хĕр çуратса çитĕнтернĕ: Валерьян, Владимир, Наталья. Ачисем пурте çемьеллĕ, ачаллă. Валерьян ывăлĕ Чулхулари юхан шыв çийĕн тĕрлĕ хатĕрсемпе çÿрекенсене хатĕрлекен техникумран вĕренсе тухнă. Çар службине Афганистан çĕрĕ çинче ирттернĕ. Поселокра пурăнать, тĕрлĕ ĕçсенче ĕçлет. Унăн çемйинче икĕ хĕр. Аслă хĕрĕ Шупашкарта Чăваш патшалăх университечĕн медицина факультетĕнче, кĕçĕнни Шупашкарти 4 номерлĕ гимназире вĕренеççĕ. Владимир ывăлĕ Хусанти пединститутран вĕренсе тухнă, халĕ районти пушар хуралĕн службинче аслă водитель, унăн çемйинче пĕр хĕр ача çитĕнет. Наталья хĕрĕ Шупашкарти И.Н.Ульянов ячĕллĕ ЧПУн юридици факультетне, Шупашкарти коопераци институтне вĕренсе пĕтернĕ. Наталья Вячеславовна Шупашкарта миравай судра тĕп специалист-эксперт пулса тăрăшать. Мăшăрĕпе иккĕшĕ ывăл çитĕнтереççĕ.
Нина Михайловнăпа Вячеслав Леонтьевич хăйсен ачисемпе, мăнукĕсемпе, вĕсен çитĕнĕвĕсемпе чунтан савăнаççĕ, кашнинчех хăйсем патне килессе чăтăмсăррăн кĕтеççĕ.
Чăваш Республикин Пуçлăхĕн 2013 çулхи июлĕн 2-мĕшĕнчи 66 номерлĕ Указĕпе килĕшÿллĕн Кивĕ Вăрмарта пурăнакан Морозовсен çемйине «Юратупа шанчăклăхшăн» орденпа наградăлама йышăннă.
Э.МИХАЙЛОВА