2013.01.30 Ветерансем канашлаççĕ («Наша жизнь (Пирĕн пурнăç)», Красные Четаи )

Эрне кун район администрацийĕнче ветерансен канашлăвĕ иртрĕ. Ăна районти пенсионерсен пĕрлешĕвĕн председателĕ Юрий Егоров ертсе пычĕ. Канашлура ветерансен, инвалидсен организацийĕсен ертÿçисем Галина Тимакова тата Евдокия Сергеева 2012 çулхи ĕçсен пĕтĕмлетĕвĕпе паллаштарчĕç, умри тĕллевсем çинче чарăнса тăчĕç.

Иртнĕ çулта районти пĕлтерĕшлĕ пулăмсене халалласа сахал мар ĕç туса ирттернине, вĕсенче аслă ăру çыннисем май килнĕ таран хутшăннине, тĕрлĕ мероприятисем йĕркеленине пĕлтерчĕç.

Ветерансем уйрăмах çитĕнекен ăрăва тĕрĕс воспитани парасси, ĕлĕкхи йăласене упраса хăварасси пирки калаçрĕç тата ытти çивĕч ыйтусене хускатрĕç.

Ĕçлĕ тĕл пулăва район администрацийĕн пуçлăхĕ Александр Башкиров хутшăнчĕ. Вăл аслă ăру çыннисем район пурнăçĕнче пĕлтерĕшлĕ вырăн йышăннине аса илтерчĕ, районăн экономикăпа социаллă аталанăвне тишкерчĕ.

Юлашкинчен вăл пенсионерсен пĕрлешĕвĕн ертÿçине Юрий Егорович Егорова район аталанăвне пысăк тÿпе хывнăшăн тата 70 çулхи юбилей ячĕпе Тав çырăвĕ парса чысларĕ.

В.РОМАНОВ.